L-EU Login hu s-servizz ta’ awtentikazzjoni tal-utent tal-Kummissjoni Ewropea. Hu jippermetti lill-persuni awtorizzati jaċċessaw firxa wiesgħa ta' servizzi online tal-Kummissjoni, bl-użu ta' indirizz tal-email wieħed u ta' password waħda.
Ir-Reġistru tat-Trasparenza fih informazzjoni pubblika – bl-unika eċċezzjoni ta’ xi data personali, ipprovduta bħala parti mill-proċess tar-reġistrazzjoni, li ma tiġix ippubblikata.
L-EU Login iżid is-sigurtà tal-aċċess billi juża teknoloġija żviluppata u miżmuma b’mod regolari minn tim ta’ speċjalisti tas-sigurtà.
Bis-saħħa tal-EU Login, l-aċċess tiegħek għad-data tar-reġistrazzjoni hu bbażat fuq metodu ta’ identifikazzjoni individwali aktar sikur.
M’aħniex se nużaw aktar l-email biex nikkomunikaw miegħek.
Biex tinteraġixxi mar-Reġistru tat-Trasparenza, jew tikkomunika mal-istaff tiegħu, se tuża l-ispazju ristrett tiegħek fir-reġistru.
Se jkollok bżonn kont tal-EU Login biex tawtentika l-identità tiegħek sabiex tkun tista’ tissottometti applikazzjoni lir-reġistru, taġġorna reġistrazzjoni eżistenti, tippreżenta lment jew tikkuntattjana.
Ara l-gwida għall-utenti u l-FAQs tal-EU Login.
Għandek bżonn kont tal-EU Login biex tirreġistra l-organizzazzjoni tiegħek.
Biex toħloq kont:
- Agħżel Irreġistra organizzazzjoni ġdida fil-menù tas-sit fil-paġna ewlenija tar-Reġistru tat-Trasparenza. Se tiġi ridirett lejn il-paġna tal-EU Login.
Jekk ma tiġix ridirett, mur direttament fil-paġna tal-EU Login:
Agħżel Oħloq kont jew sempliċiment daħħal l-indirizz tal-email tiegħek, ikklikkja Li jmiss u segwi l-istruzzjonijiet mogħtija.
Ladarba tkun ħloqt il-kont tal-EU Login, tista’ tmur lura fir-Reġistru tat-Trasparenza, tuża l-kredenzjali tal-EU Login tiegħek biex tilloggja fl-ispazju ristrett tiegħek u tibda l-proċess tar-reġistrazzjoni.
Kull kont tal-EU Login huwa assoċjat ma’ persuna individwali u l-indirizz tal-email tagħha. Dik il-persuna u dak l-indirizz tal-email se jsiru l-ewwel persuna (prestabbilita) bid-drittijiet ta’ aċċess għar-reġistrazzjoni. Din l-informazzjoni se tiġi riflessa taħt l-intestatura 6 tar-reġistrazzjoni (“Persuni b’aċċess għar-reġistrazzjoni”) ladarba tiġi vvalidata.
Is-sistema se tippermetti minimu ta’ 2 u massimu ta’ 6 utenti differenti (wieħed minnhom hu int: il-persuna li timla l-formola tal-applikazzjoni) b’aċċess għall-ispazju ristrett/għar-reġistrazzjoni.
Jekk meħtieġ, jekk jogħġbok ipprovdi l-indirizzi tal-email ta’ kwalunkwe persuna addizzjonali (huma permessi sa 6 persuni) fl-intestatura 6 tal-formola. Kull waħda minn dawn il-persuni għandha bżonn kont tal-EU Login individwali biex taċċessa l-istess spazju ristrett/reġistrazzjoni.
Meta tagħżel Irreġistra organizzazzjoni ġdida fil-paġna ewlenija tar-Reġistru tat-Trasparenza, se tiġi ridirett lejn il-paġna tal-EU Login. Uża l-kredenzjali tal-EU Login tiegħek biex tilloggja fl-ispazju ristrett tiegħek biex tibda l-proċess tar-reġistrazzjoni.
Fi tmiem il-proċess tar-reġistrazzjoni, is-sistema awtomatikament tillinkja l-kont tal-EU Login tiegħek mar-reġistrazzjoni li tkun lestejt u tagħtik aċċess għal aġġornamenti futuri (il-persuni elenkati fl-intestatura 6 tal-formola tar-reġistrazzjoni jiġu infurmati dwar kwalunkwe aġġornament).
Kull kont tal-EU Login huwa assoċjat ma’ persuna individwali u l-indirizz tal-email tagħha. Dik il-persuna u dak l-indirizz tal-email se jsiru l-ewwel persuna (prestabbilita) bid-drittijiet ta’ aċċess għall-ispazju ristrett/għar-reġistrazzjoni. Din l-informazzjoni se tiġi riflessa fl-intestatura 6 tar-reġistrazzjoni (“Persuni b’aċċess għar-reġistrazzjoni”) ladarba tiġi vvalidata.
Minimu ta’ 2 u massimu ta’ 6 utenti differenti (wieħed minnhom hu int: il-persuna li timla l-formola tar-reġistrazzjoni) għandhom permess jaċċessaw l-ispazju ristrett/ir-reġistrazzjoni.
Jekk meħtieġ, jekk jogħġbok ipprovdi l-indirizzi tal-email ta’ kwalunkwe persuna addizzjonali (huma permessi sa 6 persuni) fl-intestatura 6 tar-reġistrazzjoni. Kull waħda minn dawn il-persuni għandha bżonn kont tal-EU Login individwali biex taċċessa l-istess spazju ristrett/reġistrazzjoni.
Għandek bżonn kont tal-EU Login biex taċċessa l-organizzazzjoni rreġistrata tiegħek fir-Reġistru tat-Trasparenza. Dan ifisser li ismek u l-indirizz tal-email tiegħek iridu jkunu fil-lista fl-intestatura 6 tar-reġistrazzjoni (“Persuni b’aċċess għar-reġistrazzjoni”).
Jekk m’intix f’dik il-lista u teħtieġ aċċess għall-ispazju ristrett/għar-reġistrazzjoni, waħda mill-persuni l-oħra li għandha aċċess trid iżżid ismek u l-indirizz tal-email tiegħek ma’ dik il-lista.
Minimu ta’ 2 u massimu ta’ 6 utenti differenti għandhom permess jaċċessaw l-ispazju ristrett/ir-reġistrazzjoni.
Għandek bżonn kont tal-EU Login biex taċċessa l-organizzazzjoni rreġistrata tiegħek fir-Reġistru tat-Trasparenza jew biex tingħata aċċess għar-reġistrazzjoni. Dan ifisser li ismek u l-indirizz tal-email tiegħek iridu jkunu fil-lista fl-intestatura 6 tar-reġistrazzjoni (“Persuni b’aċċess għar-reġistrazzjoni”).
Jekk teħtieġ aċċess għar-reġistrazzjoni, waħda mill-persuni l-oħra li għandha aċċess trid iżżid ismek u l-indirizz tal-email tiegħek mal-lista fl-intestatura 6 tar-reġistrazzjoni.
Is-sistema se tippermetti minimu ta’ 2 u massimu ta’ 6 utenti differenti b’aċċess għall-ispazju ristrett/għar-reġistrazzjoni.
Jekk ismek u l-indirizz tal-email tiegħek żdiedu mal-lista fl-intestatura 6 (“Persuni b’aċċess għar-reġistrazzjoni”), xorta għandek bżonn kont tal-EU Login biex taċċessa l-ispazju ristrett/ir-reġistrazzjoni. Jekk m’għandekx, trid toħloq wieħed.
- Agħżel Aġġorna organizzazzjoni ġdida fil-menù tas-sit fil-paġna ewlenija tar-Reġistru tat-Trasparenza. Se tiġi ridirett lejn il-paġna tal-EU Login.
Jekk ma tiġix ridirett, mur direttament fil-paġna tal-EU Login:
- Agħżel Oħloq kont jew sempliċiment daħħal l-indirizz tal-email tiegħek u agħżel Li jmiss biex toħloq il-kont il-ġdid tal-EU Login. Imbagħad segwi l-istruzzjonijiet mogħtija.
Ladarba tkun ħloqt il-kont tal-EU Login, tista’ tmur lura fil-paġna tal-login u tuża l-kredenzjali tal-EU Login tiegħek biex tilloggja.
Għandek bżonn kont tal-EU Login biex taċċessa l-organizzazzjoni rreġistrata tiegħek fir-Reġistru tat-Trasparenza jew biex tingħata aċċess għar-reġistrazzjoni. Dan ifisser li ismek u l-indirizz tal-email tiegħek iridu jkunu fil-lista fl-intestatura 6 tar-reġistrazzjoni (“Persuni b’aċċess għar-reġistrazzjoni”).
Dik il-lista fiha l-persuni b’aċċess għar-reġistrazzjoni. Jekk teħtieġ aċċess għall-ispazju ristrett/għar-reġistrazzjoni, waħda mill-persuni li għandha aċċess trid iżżid ismek u l-indirizz tal-email tiegħek mal-lista ta’ aċċess.
Is-sistema se tippermetti minimu ta’ 2 u massimu ta’ 6 utenti differenti b’aċċess għall-ispazju ristrett/għar-reġistrazzjoni.
Jekk għandek kont tal-EU Login u tinsab fil-lista ta’ aċċess tal-organizzazzjoni, meta tagħżel Aġġorna reġistrazzjoni fil-menù tas-sit fil-paġna ewlenija tar-Reġistru tat-Trasparenza, se tiġi ridirett lejn il-paġna tal-EU Login. Uża l-kredenzjali tal-EU Login tiegħek biex taċċessa l-ispazju ristrett/ir-reġistrazzjoni.
Tista’ tillinkja l-istess kont tal-EU Login ma’ reġistrazzjonijiet multipli. Dan ifisser li tista’ tuża l-istess kont tal-EU Login biex taċċessa l-ispazju ristrett/ir-reġistrazzjonijiet ta’ żewġ organizzazzjonijiet jew aktar.
Il-kontijiet tal-EU Login ma jistgħux jingħaqdu peress li huma llinkjati ma’ żewġ indirizzi tal-email differenti, għalhekk – teknikament – ma’ żewġ persuni differenti. Madankollu, huwa possibbli li wieħed minn dawn iż-żewġ kontijiet tal-EU Login jiġi llinkjat maż-żewġ reġistrazzjonijiet.
Hawnhekk għandek issib kif:
Inti responsabbli għal żewġ reġistrazzjonijiet: l-organizzazzjoni A u l-organizzazzjoni B, li t-tnejn għandhom reġistrazzjonijiet fir-Reġistru tat-Trasparenza. Fir-reġistrazzjoni tal-organizzazzjoni A inti tidher bħala “Persuna inkarigata mir-relazzjonijiet tal-UE” u bħala “persuna ta’ kuntatt” fir-reġistrazzjoni tal-organizzazzjoni B, pereżempju.
Organizzazzjoni A:
Persuna inkarigata mir-relazzjonijiet mal-UE: email: xy
organisation [dot] com (xy[at]organisation[dot]com)
Organizzazzjoni B:
Persuna ta’ kuntatt, email: xygmail [dot] com (xy[at]gmail[dot]com)
Tixtieq tuża biss kont wieħed tal-EU Login (assoċjat mal-indirizz xyorganisation [dot] com (xy[at]organisation[dot]com)) biex taċċessa ż-żewġ reġistrazzjonijiet.
Għandek bżonn:
- tilloggja fl-ispazju ristrett/fir-reġistrazzjoni tal-organizzazzjoni B billi tuża l-kont tal-EU Login assoċjat mal-indirizz xygmail [dot] com (xy[at]gmail[dot]com) (peress li dan l-indirizz jidher fir-reġistrazzjoni tal-organizzazzjoni B)
- iżżid l-indirizz xyorganisation [dot] com (xy[at]organisation[dot]com) mal-lista fl-intestatura 6 (“Persuni b’aċċess għar-reġistrazzjoni”).
Jekk tixtieq ukoll tneħħi l-indirizz tiegħek xygmail [dot] com (xy[at]gmail[dot]com) mir-reġistrazzjoni tal-organizzazzjoni B, għandek:
- tilloggja fl-ispazju ristrett billi tuża l-kont tal-EU Login assoċjat mal-indirizz xyorganisation [dot] com (xy[at]organisation[dot]com) (MHUX xygmail [dot] com (xy[at]gmail[dot]com))
- tmur fit-taqsima “Ir-reġistrazzjonijiet tiegħi” u tagħżel ir-reġistrazzjoni tal-organizzazzjoni B
- tħassar l-indirizz xygmail [dot] com (xy[at]gmail[dot]com) mil-lista fl-intestatura 6.
Fl-ispazju ristrett, agħżel “Ir-reġistrazzjonijiet tiegħi” biex tara l-organizzazzjonijiet kollha li magħhom huwa llinkjat il-kont tal-EU Login tiegħek.
Trid tapplika għall-aċċess għall-bini tal-Parlament Ewropew fil-paġna tal-akkreditazzjoni tal-PE. M’għandekx għalfejn tilloggja fl-ispazju ristrett/fir-reġistrazzjoni tiegħek fir-Reġistru tat-Trasparenza biex timmaniġġja t-talbiet tiegħek għal aċċess għall-Parlament Ewropew.
Għal aktar informazzjoni, jekk jogħġbok ara l-paġna tal-akkreditazzjoni tal-PE.
Is-sistema awtomatikament tagħti aċċess għall-kontijiet tal-EU Login assoċjati mal-indirizzi tal-email ta’:
- il-persuna ta’ kuntatt
- il-persuna b'responsabbiltà legali
- il-persuna inkarigata mir-relazzjonijiet mal-UE
- il-persuna li timla l-formola tar-reġistrazzjoni (jekk differenti minn dawk imsemmija hawn fuq).
Dawn l-indirizzi tal-email se jidhru awtomatikament fil-lista tal-organizzazzjoni tiegħek “Persuni b’aċċess għar-reġistrazzjoni” fl-intestatura 6. Tista’ żżid ukoll indirizzi tal-email addizzjonali. Minimu ta’ 2 u massimu ta’ 6 utenti jista’ jkollhom aċċess għall-ispazju ristrett/għar-reġistrazzjoni.
Jekk teħtieġ aċċess għal aktar persuni, jekk jogħġbok ipprovdi l-indirizzi tal-email tagħhom fl-intestatura 6 tal-formola tar-reġistrazzjoni. Kull waħda minn dawn il-persuni għandha bżonn kont tal-EU Login individwali biex taċċessa l-ispazju ristrett/ir-reġistrazzjoni.
Tista’ tillinkja kont wieħed tal-EU Login ma’ organizzazzjoni waħda jew aktar elenkati fir-reġistru.
Ismek u l-indirizz tal-email illinkjati mal-organizzazzjoni li titlaq minnha għandhom jitneħħew mir-reġistrazzjoni tagħha. Peress li r-reġistrazzjoni jeħtieġ li tinżamm aġġornata, dan għandu jsir hekk kif titlaq mill-organizzazzjoni.
Ma tistax tagħmel dan inti stess.
Ikollok tistaqsi:
- waħda mill-persuni li għandha aċċess għall-ispazju ristrett/l-organizzazzjoni li qed titlaq minnha biex tneħħi l-email tiegħek mil-lista ta’ aċċess
- persuna li għandha aċċess għall-ispazju ristrett/ir-reġistrazzjoni li qed tingħaqad magħha biex iżżid l-email tiegħek fil-lista ta’ aċċess.
Ir-rappreżentanti ta’ grupp ta’ interess għandhom jirreġistraw. Dan ifisser kwalunkwe organizzazzjoni jew individwu li jinvolvi ruħu f’attivitajiet koperti mir-reġistru.
Attivitajiet mhux koperti mir-reġistru jinkludu l-għoti ta’ pariri legali u professjonali oħra, laqgħat spontanji, sottomissjonijiet u laqgħat li huma parti mill-proċeduri amministrattivi ta’ sħab soċjali li jieħdu sehem fid-Djalogu Soċjali u t-tweġiba għal talbiet għal informazzjoni fattwali u għarfien espert mill-istituzzjonijiet.
Il-monitoraġġ tal-liġi tal-UE jew tal-iżviluppi tal-politika għal skopijiet akkademiċi jew ġurnalistiċi, ta’ interess personali jew sabiex jiġi eżerċitat dritt mhuwiex kopert (pereżempju, intervisti minn riċerkaturi jew ġurnalisti dwar il-leġiżlazzjoni li tkun ġejja, jew it-tħejjija għat-tressiq ta’ petizzjoni lill-Parlament Ewropew).
Individwi li jwettqu attivitajiet f’kapaċità strettament personali u mhux f’assoċjazzjoni ma’ oħrajn mhumiex ikkunsidrati bħala rappreżentanti ta’ grupp ta’ interess.
Ċerti korpi, bħal awtoritajiet pubbliċi ta’ pajjiżi tal-UE u pajjiżi mhux tal-UE, assoċjazzjonijiet u networks ta’ awtoritajiet pubbliċi, organizzazzjonijiet intergovernattivi, partiti politiċi, knejjes u assoċjazzjonijiet jew komunitajiet reliġjużi, u organizzazzjonijiet filosofiċi u mhux konfessjonali m’għandhomx għalfejn jirreġistraw, b’xi eċċezzjonijiet.
Il-lista sħiħa tal-attivitajiet mhux koperti mir-reġistru huma elenkati fil-ftehim interistituzzjonali (l-Artikolu 4).
Jekk uħud mill-attivitajiet tiegħek biss huma koperti mir-reġistru, mela għandek tiddikjara biss dawk l-attivitajiet.
Ir-reġistru jkopri l-attivitajiet kollha mwettqa bl-għan li jinfluwenzaw il-formulazzjoni jew l-implimentazzjoni tal-politika jew il-leġiżlazzjoni tal-UE, jew tal-proċessi tat-teħid tad-deċiżjonijiet tal-istituzzjonijiet tal-UE, ħlief għal ċerti attivitajiet speċifikati elenkati fil-ftehim interistituzzjonali (l-Artikolu 4).
Dawn l-attivitajiet jistgħu jinkludu:
- l-organizzazzjoni jew il-parteċipazzjoni f’laqgħat, f’konferenzi, f’eventi
- il-kontribuzzjoni jew il-parteċipazzjoni f’konsultazzjonijiet pubbliċi, seduti ta’ smigħ jew inizjattivi simili oħra
- l-organizzazzjoni ta’ kampanji ta’ komunikazzjoni, pjattaformi, networks jew inizjattivi fil-livell lokali
- it-tħejjija jew l-ikkummissjonar ta’ dokumenti ta’ politika u ta’ pożizzjoni, stħarriġiet tal-opinjoni pubblika, surveys, ittri miftuħa, xogħol ta’ riċerka.
Ir-rappreżentanza ta’ grupp ta’ interess isseħħ ukoll meta l-persuni li jaħdmu fl-affarijiet pubbliċi jiġbru b’mod attiv l-intelligence billi jimmonitorjaw iċ-ċiklu tat-teħid tad-deċiżjonijiet leġiżlattivi. Dan għandu jissemma meta ssir ir-reġistrazzjoni, speċjalment meta jkun hemm kuntatti diretti mal-istituzzjonijiet.
Jekk għadek kif bdejt jew qed tħejji attivitajiet ta’ influwenza, trid tkun tista’ tipprovdi dettalji speċifiċi dwarhom.
Għal aktar informazzjoni, jekk jogħġbok irreferi għal-linji gwida (Parti II.1).
Ir-reġistrazzjoni hija volontarja għal dawk involuti f’attivitajiet ta’ rappreżentanza ta’ grupp ta’ interess (ara l-Artikoli 3 u 6 tal-ftehim interistituzzjonali u l-linji gwida - Parti II.1).
Madankollu, trid tkun irreġistrat biex twettaq ċerti attivitajiet li għalihom l-istituzzjonijiet tal-UE jeħtieġu reġistrazzjoni minn qabel, pereżempju biex tiltaqa’ ma’ ċerti persuni li jieħdu d-deċiżjonijiet jew staff anzjan tal-istituzzjonijiet tal-UE, titkellem f’avvenimenti pubbliċi fil-Parlament Ewropew jew issir membru tal-gruppi ta’ esperti tal-Kummissjoni Ewropea. Biex jippromwovu negozjati trasparenti u etiċi mar-rappreżentanti ta’ grupp ta’ interess, l-istituzzjonijiet tal-UE jpoġġu ċerti kundizzjonijiet fuq l-interazzjoni tagħhom magħhom. Dan hu l-prinċipju tal-“kundizzjonalità”. Dan il-prinċipju jirrikjedi lir-rappreżentanti ta’ grupp ta’ interess biex jirreġistraw sabiex iwettqu ċerti attivitajiet.
Il-miżuri ta’ kundizzjonalità huma regoli adottati minn kull istituzzjoni li skonthom ċerti attivitajiet mir-rappreżentanti ta’ grupp ta’ interess jistgħu jsiru bil-kundizzjoni li dawn ikunu rreġistraw fir-Reġistru tat-Trasparenza. Dawn ir-regoli huma ppubblikati fil-paġna dwar il-Kundizzjonalità.
L-istituzzjonijiet jistgħu jadottaw miżuri ta’ trasparenza kumplementari biex iħeġġu aktar individwi u organizzazzjonijiet jirreġistraw, filwaqt li jsaħħu t-trasparenza. Ir-reġistrazzjoni mhijiex meħtieġa biex wieħed jibbenefika minn dawn il-miżuri.
Eżempji ta’ trasparenza kumplementari huma l-pubblikazzjoni mill-istituzzjonijiet ta’ laqgħat bejn dawk li jieħdu d-deċiżjonijiet u r-rappreżentanti ta’ grupp ta’ interess tagħhom, inċentivi li jiffaċilitaw il-parteċipazzjoni tar-rappreżentanti ta’ grupp ta’ interess f’konsultazzjonijiet pubbliċi u twissijiet ta’ informazzjoni mfassla apposta li r-rappreżentanti ta’ grupp ta’ interess jistgħu jabbonaw għalihom mill-formola tar-reġistrazzjoni.
Il-miżuri kollha ta’ kundizzjonalità u ta’ trasparenza kumplementari adottati mit-3 istituzzjonijiet ewlenin tal-UE (il-Parlament, il-Kummissjoni, il-Kunsill) huma ppubblikati fil-paġna dwar il-Kundizzjonalità.
Din il-paġna tinkludi wkoll miżuri ta’ istituzzjonijiet oħra tal-UE u pajjiżi tal-UE (li jkopru l-interazzjonijiet tar-rappreżentanti ta’ grupp ta’ interess mar-rappreżentanzi permanenti tagħhom għall-UE), fejn dawn ġew innotifikati.
Iva, għandek tirreġistra jekk twettaq attivitajiet koperti mir-reġistru. Ir-rappreżentanti ta’ grupp ta’ interess huma mistennija jirreġistraw irrispettivament minn jekk humiex individwu jew organizzazzjoni, it-tip ta’ organizzazzjoni tagħhom, id-daqs tal-organizzazzjoni tagħhom, u l-mezzi ta’ komunikazzjoni li jużaw għall-attivitajiet tagħhom.
Individwi li jwettqu attivitajiet f’kapaċità strettament personali u mhux f’assoċjazzjoni ma’ oħrajn mhumiex ikkunsidrati bħala rappreżentanti ta’ grupp ta’ interess.
L-organizzazzjonijiet stabbiliti jew li joperaw f’aktar minn pajjiż wieħed (bħal multinazzjonali, NGOs b’kapitli f’diversi pajjiżi jew reġjuni) għandhom jirreġistraw l-attivitajiet ta’ rappreżentanza ta’ grupp ta’ interess tagħhom darba biss. Fil-prattika, il-fergħa jew l-uffiċċju responsabbli għar-relazzjonijiet mal-UE normalment ikun l-aktar wieħed xieraq biex jirreġistra, u b’hekk ikopri l-partijiet l-oħra tal-organizzazzjoni. Meta tirreġistra, għandek tispeċifika liema partijiet tal-organizzazzjoni tiegħek huma inklużi fir-reġistrazzjoni.
Għal aktar informazzjoni, jekk jogħġbok irreferi għal-linji gwida (Parti II.2).
Iva, il-klijenti għandhom jirreġistraw peress li huma involuti f’attivitajiet koperti mir-reġistru permezz ta’ intermedjarju. Meta tirreġistra, trid tipprovdi informazzjoni dwar dawk l-intermedjarji, bħal konsulenzi jew ditti legali, li qed iwettqu attivitajiet f’ismek.
Għal aktar informazzjoni, jekk jogħġbok irreferi għal-linji gwida (Parti II.5, Intestatura 14).
Fil-prinċipju, le. Jekk tipprovdi l-informazzjoni kollha meħtieġa dwar il-membri, l-affiljati jew is-sussidjarji tiegħek meta tirreġistra, dawn ma jkollhomx għalfejn jirreġistraw.
Madankollu, jekk int membru, sussidjarju jew affiljat ta’ rappreżentant ta’ grupp ta’ interess irreġistrat u twettaq l-attivitajiet ta’ rappreżentanza ta’ grupp ta’ interess tiegħek stess indipendentement mill-organizzazzjoni “umbrella” rreġistrata, allura għandek tirreġistra individwalment.
Iva, għandek tirreġistra jekk twettaq attivitajiet koperti mir-reġistru, irrispettivament mill-post tal-uffiċċju tiegħek. Se tintalab tipprovdi dettalji dwar l-uffiċċju tiegħek inkarigat mir-relazzjonijiet mal-istituzzjonijiet tal-UE (jekk għandek wieħed).
Iva, reġistrazzjoni waħda tkopri kwalunkwe attività li tinvolvi l-Parlament Ewropew, il-Kunsill u l-Kummissjoni. Jekk l-attivitajiet tiegħek jinvolvu istituzzjoni oħra tal-UE, għandek tirreġistra u tipprovdi kwalunkwe informazzjoni rilevanti dwar dawk l-attivitajiet.
Avukati u ditti legali individwali għandhom jirreġistraw meta jwettqu attivitajiet koperti mir-reġistru f’isimhom stess jew f’isem il-klijenti tagħhom. Meta tirreġistra, trid tipprovdi informazzjoni dwar il-klijenti li qed tirrappreżenta fir-rigward ta’ dawk l-attivitajiet.
M’għandekx għalfejn tirreġistra jekk qed tipprovdi pariri legali u professjonali oħra fil-każijiet li ġejjin.
- Il-parir jikkonsisti f'rappreżentanza tal-klijenti fi proċedura ta' konċiljazzjoni jew medjazzjoni li jkollha l-għan li tevita l-preżentazzjoni ta' tilwima quddiem korp ġudizzjarju jew amministrattiv.
- Il-parir jingħata lill-klijenti biex jgħinhom jiżguraw li l-attivitajiet tagħhom jikkonformaw mal-qafas ġuridiku eżistenti
- Il-parir jikkonsisti fir-rappreżentanza tal-klijenti u s-salvagwardja tad-drittijiet fundamentali jew proċedurali tagħhom (bħad-dritt li jinstemgħu, id-dritt għal proċess ġust u d-dritt għad-difiża fi proċedimenti amministrattivi), u jinkludi attivitajiet imwettqa minn avukati jew minn kwalunkwe professjonist ieħor involut fir-rappreżentanza tal-klijenti u fis-salvagwardja tad-drittijiet fundamentali jew proċedurali tagħhom.
Iva, trid tirreġistra jekk l-objettiv tiegħek għal din il-laqgħa huwiex li tiddiskuti u potenzjalment tinfluwenza l-formulazzjoni jew l-implimentazzjoni tal-politika jew tal-leġiżlazzjoni, jew il-proċessi tat-teħid tad-deċiżjonijiet tal-istituzzjonijiet tal-UE. Jekk ma tkunx irreġistrat, ma jkunx possibbli għalik li tiltaqa’ mal-Kummissarju, jew mar-rappreżentanti tal-kabinett tiegħu.
Għal kwalunkwe xenarju jew attività oħra mhux koperta jekk jogħġbok ikkuntattja lill-uffiċċju (tal-kabinett) tal-Kummissarju kkonċernat.
Jekk se ġġib klijenti għal-laqgħa, dawn iridu jkunu rreġistrati wkoll fir-Reġistru tat-Trasparenza. Madankollu, jekk se ġġib organizzazzjonijiet membri miegħek bħala assoċjazzjoni “umbrella” u pprovdejt informazzjoni dwar is-sħubija tiegħek, dawn m’għandhomx għalfejn jirreġistraw. Jekk ikunu qed jirrappreżentaw l-interessi tal-organizzazzjoni tagħhom stess fil-laqgħa, iridu jirreġistraw individwalment.
Le, ma jkoprix attivitajiet ta’ lobbying imwettqa fil-livell nazzjonali. Attivitajiet bħal dawn jistgħu jaqgħu taħt il-leġiżlazzjoni nazzjonali dwar il-lobbying nazzjonali.
Ir-rappreżentanti ta’ grupp ta’ interess iridu jirreġistraw jekk se jiltaqgħu ma’ Rappreżentant Permanenti jew Viċi Rappreżentant Permanenti għall-UE ta’ gvern tal-UE meta dawk l-uffiċjali jaġixxu fil-kapaċità tagħhom bħala presidenza tal-Kunsill. Dan japplika matul il-presidenza u fis-6 xhur ta’ qabel.
Kull wieħed mill-Istati Membri tal-UE li kellhom il-presidenza tal-Kunsill minn Lulju 2021 ħoloq paġna ddedikata fis-sit web rilevanti tal-Presidenza biex jirrifletti dan l-impenn.
Kwalunkwe Stat Membru jista’ jiddeċiedi wkoll li jadotta, f’konformità mal-liġi u l-kompetenzi nazzjonali tiegħu, aktar miżuri ta’ kundizzjonalità jew ta’ trasparenza kumplementari li jikkonċernaw ir-rappreżentanza permanenti tiegħu għall-UE.
Dawn il-miżuri huma ppubblikati fis-sit web tar-Reġistru tat-Trasparenza. Għal aktar informazzjoni, jekk jogħġbok irreferi għal-linji gwida (Parti I.3).
Għandek tkun irreġistrat biex tiltaqa’ ma’ Membru tal-Parlament Ewropew (MEP). Il-membri tal-PE jużaw id-data tar-Reġistru tat-Trasparenza biex jippubblikaw informazzjoni dwar il-laqgħat skedati tagħhom stess ma’ rappreżentanti ta’ grupp ta’ interess dwar il-ħidma parlamentari fil-paġni tal-profil tagħhom fis-sit web tal-Parlament Ewropew.
Jekk inti eks Membru tal-PE jew timpjega eks Membru tal-PE, huwa importanti li tkun konxju ta’ ċerti regoli. Dawn ir-regoli jinkludu perjodu ta’ preklużjoni ta’ 6 xhur fi tmiem il-mandat tal-MEP li matulu ma jistax jagħmel lobbying mal-pari tiegħu li għandhom siġġu fil-Parlament. Il-Membri b’siġġu fil-Parlament għandhom jirrispettaw dan il-perjodu ta’ preklużjoni. L-eks Membri jistgħu jirreġistraw biss l-attivitajiet ta’ rappreżentanza ta’ grupp ta’ interess tagħhom u japplikaw għal aċċess għall-Parlament wara dan il-perjodu ta’ preklużjoni.
Trid tkun irreġistrat:
- jekk inti kelliem, moderatur, preżentatur, oratur, membru tal-bord jew kontributur f’avveniment parlamentari
- jekk, bħala rappreżentant ta’ grupp ta’ interess, inti involut fl-organizzazzjoni ta’ avveniment li jkun ġie awtorizzat minn korp parlamentari jew minn grupp politiku, kemm jekk ikun minn perspettiva loġistika, prattika jew finanzjarja.
Jekk m’intix irreġistrat jew ir-reġistrazzjoni tiegħek tiġi sospiża fil-jum tal-avveniment, ma titħalliex tipparteċipa fl-avveniment. Trid tiżgura li tkun irreġistrajt ferm minn qabel l-avveniment u li r-reġistrazzjoni tiegħek tkun ġiet ivvalidata.
Għandek issemmi d-data u t-titlu tal-avveniment fir-reġistrazzjoni tiegħek taħt “attivitajiet ta’ komunikazzjoni”.
Tista’ tirreġistra jekk tindika b’mod ċar fil-formola ta’ reġistrazzjoni li twettaq attivitajiet koperti mir-reġistru, tosserva l-kodiċi ta’ kondotta meta twettaq dawn l-attivitajiet u tissottometti applikazzjoni għar-reġistrazzjoni.
L-entrata tiegħek se tkun viżibbli għall-pubbliku ladarba niċċekkjaw u nivvalidaw ir-reġistrazzjoni tiegħek.
Le, ir-reġistrazzjoni hija bla ħlas.
Trid tipprovdi:
- informazzjoni dwar l-organizzazzjoni tiegħek: l-isem, it-tip ta’ organizzazzjoni, id-dettalji ta’ kuntatt, il-miri u l-missjoni, is-sħubija
- informazzjoni dwar l-interessi li tirrappreżenta u l-leġiżlazzjoni u l-politiki speċifiċi tal-UE fil-mira tal-attivitajiet tiegħek
- informazzjoni finanzjarja, skont in-natura tal-interessi rappreżentati.
Kun ċert li din l-informazzjoni tkun kompluta, aġġornata, preċiża u li ma tqarraqx.
Għal aktar informazzjoni, jekk jogħġbok irreferi għal-linji gwida (Parti I.5).
Ir-reġistru huwa pubbliku. Madankollu, mhux l-informazzjoni kollha li tipprovdi tiġi ppubblikata, b’mod partikolari informazzjoni personali, bħal indirizzi tal-email u ismijiet ta’ kuntatti. L-oqsma mmarkati b’għajn maqtugħa mhumiex pubbliċi.
Għal aktar dettalji dwar l-ipproċessar tad-data personali tiegħek, jekk jogħġbok irreferi għall-avviż dwar il-protezzjoni tad-data.
Organizzazzjonijiet ġodda jridu jipprovdu stimi għas-sena finanzjarja attwali, bħal informazzjoni dwar kwalunkwe għotja tal-UE li jkunu rċevew. Jekk tirrappreżenta klijenti jew tuża servizzi ta’ intermedjarji iżda għadek m’għalaqtx il-kontijiet tiegħek, trid tagħti biss l-ismijiet ta’ dawn il-klijenti jew l-intermedjarji.
Tista’ tagħżel biss l-opzjoni “Entità ffurmata reċentement” għall-ewwel sentejn tar-reġistrazzjoni tiegħek. Għal aktar informazzjoni, jekk jogħġbok irreferi għal-linji gwida (Parti II.5 - Intestatura 14).
Meta tirreġistra, trid tagħżel l-interessi li tirrappreżenta bħala organizzazzjoni jew bħala individwu li jaħdem għal rasu. Tista’ tagħżel minn dawn li ġejjin:
- tippromwovi l-interessi tiegħek stess jew l-interessi kollettivi tal-membri tiegħek
- tavvanza l-interessi tal-klijenti tiegħek
- ma tirrappreżenta l-ebda interess kummerċjali.
L-għażla tal-interessi li tirrappreżenta mhijiex marbuta mal-istatus legali tiegħek. Pereżempju, l-organizzazzjonijiet mingħajr skop ta’ qligħ m'għandhomx neċessarjament jagħżlu “ma jirrappreżentawx interessi kummerċjali”.
L-interessi li tagħżel għandhom jirriflettu l-għan tal-attivitajiet tiegħek li jinvolvu l-istituzzjonijiet tal-UE u li qed taġixxi f’isimhom.
Pereżempju, assoċjazzjoni tal-avukati professjonali jew assoċjazzjoni medika normalment tippromwovi l-interessi kollettivi tal-professjoni legali jew medika u l-membri tagħhom (li huma avukati li jaħdmu għal rashom jew tobba u/jew persuni ġuridiċi ta’ natura kummerċjali jew bi skop ta’ qligħ). Bl-istess mod, assoċjazzjonijiet umbrella ta’ tali avukati jew assoċjazzjonijiet mediċi fil-livell tal-UE normalment jirrappreżentaw l-interessi kollettivi tal-assoċjazzjonijiet membri tagħhom stess u, fl-aħħar mill-aħħar, il-membri ta’ dawn l-assoċjazzjonijiet tal-aħħar.
Pereżempju, ditta tal-affarijiet pubbliċi għandha kuntratt ma’ parti terza biex tavvanza l-interessi tagħha li jinvolvu l-istituzzjonijiet tal-UE, mela għandha tagħżel “tavvanza l-interessi tal-klijenti”.
Pereżempju, grupp ta’ riflessjoni li l-għan ewlieni tiegħu huwa li javvanza kawżi soċjali fl-interess pubbliku, fil-qasam tal-akkomodazzjoni soċjali, għandu jiddikjara li ma jirrappreżentax interessi kummerċjali.
Għal aktar informazzjoni, jekk jogħġbok ara l-linji gwida (Parti II.5 - Intestatura 8).
Trid tipprovdi:
- id-dettalji ta’ kwalunkwe għotja tal-UE li rċevejt u li kkontribwiet għall-kostijiet operattivi tiegħek fis-sena finanzjarja rilevanti (awtorità ta’ finanzjament u programm)
- l-istima tal-kostijiet annwali marbuta mal-attivitajiet koperti mir-reġistru
- l-ismijiet ta’ kwalunkwe intermedjarju li tuża u l-kost ta’ kull intermedjarju individwali għall-attivitajiet korrispondenti
L-ammonti kollha għandhom ikunu f’euro.
Trid tipprovdi:
- id-dettalji ta’ kwalunkwe għotja tal-UE li rċevejt u li kkontribwiet għall-kostijiet operattivi tiegħek fis-sena finanzjarja rilevanti (awtorità ta’ finanzjament u programm)
- l-ammont tad-dħul għal kull klijent (flimkien ma’ isimhom u l-politiki mmirati).
Se nagħmlu stima tad-dħul annwali totali ġġenerat attribwibbli għal attivitajiet koperti mir-reġistru b’mod awtomatiku.
Informazzjoni relatata ma’ attivitajiet ta’ rappreżentanza ta’ grupp ta’ interess imwettqa f’isem gvern jew awtorità pubblika mhux tal-UE.
L-ammonti kollha għandhom ikunu f’euro.
Għandek:
- tipprovdi d-dettalji ta’ kwalunkwe għotja tal-UE li rċevejt u li kkontribwiet għall-kostijiet operattivi tiegħek fis-sena finanzjarja rilevanti (awtorità ta’ finanzjament u programm)
- tispeċifika l-baġit totali annwali u s-sorsi ewlenin ta’ finanzjament skont il-kategorija (finanzjament pubbliku, għotjiet, donazzjonijiet, kontribuzzjoni tal-membri, eċċ.),
- tiddikjara kwalunkwe kontribuzzjoni finanzjarja lill-organizzazzjoni tiegħek u kwalunkwe attività ta’ rappreżentanza ta’ grupp ta’ interess li tinvolvi individwi jew organizzazzjonijiet minn pajjiżi mhux tal-UE
- iddaħħal l-ammont ta’ kull kontribuzzjoni li rċevejt li huwa aktar minn €10,000 u li jaqbeż 10% tal-baġit totali tiegħek u tagħti l-isem tal-kontributur.
L-ammonti kollha għandhom ikunu f’euro.
Iva, ir-reġistru jippermetti li żewġ rappreżentanti ta’ grupp ta’ interess jiddikjaraw l-istess nefqa (“għadd doppju”). Dan jevita sottostima ta’ kwalunkwe nefqa finanzjarja ddikjarata.
Rappreżentant ta’ grupp ta’ interess jista’ jiddikjara l-kostijiet tal-attivitajiet. Rappreżentant ta’ grupp ta’ interess ieħor jista’ jiddikjara l-istess ammont riċevut mill-ewwel rappreżentant ta’ grupp ta’ interess f’termini ta’ fatturat (minn klijenti) jew f’termini ta’ baġit (minn tariffi tas-sħubija).
Pereżempju, il-kumpanija tiegħek tikkuntratta konsulenza dwar l-affarijiet pubbliċi għal ammont ta’ €50,000. Dan l-ammont se jidher darbtejn fir-reġistru:
- fl-istima tal-kumpanija tiegħek tal-kostijiet annwali ta’ attivitajiet koperti mir-reġistru
fid-dħul tal-konsulenza tal-affarijiet pubbliċi minn servizzi pprovduti lill-klijenti.
Aħna nirrakkomandaw li ma tiġix inkluża l-VAT fl-istimi (kost, fatturat jew dħul mill-klijenti) minħabba li l-VAT hi taxxa u mhux kost assoċjat ma’ attivitajiet ta' affarijiet pubbliċi. Il-VAT tista’ tapplika f’rati differenti u tista' tiġi imposta b’modi differenti minn pajjiżi tal-UE u pajjiżi oħrajn.
Trid taġġorna r-reġistrazzjoni tiegħek tal-anqas darba fis-sena.
L-informazzjoni fir-reġistru hija pubblika u hija skrutinizzata mill-qrib mill-partijiet ikkonċernati, l-akkademiċi, l-istudenti, il-ġurnalisti, l-individwi privati u oħrajn. Għalhekk, huwa fl-interess tiegħek li tirrevedi regolarment ir-reġistrazzjoni tiegħek u żżommha aġġornata.
Trid taġġorna r-reġistrazzjoni tiegħek tal-anqas darba fis-sena. Madankollu, nirrakkomandaw li tirrevedi r-reġistrazzjoni kollha tiegħek mill-inqas darbtejn fis-sena biex tiżgura li l-informazzjoni tkun aġġornata u rilevanti.
Għandek tikkunsidra wkoll li taġġorna r-reġistrazzjoni tiegħek hekk kif kwalunkwe informazzjoni li tkun ipprovdejt fiha ssir skaduta jew mhux preċiża (pereżempju, wara bidliet fl-istruttura, l-istaff jew l-attivitajiet tiegħek).
Nistgħu nikkuntattjawk fi kwalunkwe ħin u nitolbuk taġġorna r-reġistrazzjoni tiegħek bħala parti mill-kontrolli tal-kwalità tad-data tagħna.
Trid tilloggja biex tagħmel aġġornament. Tista’ taġġorna partijiet tar-reġistrazzjoni tiegħek fi kwalunkwe ħin biex taġġorna jew tikkoreġi l-informazzjoni f’taqsima, pereżempju, bidla fil-persuna ta’ kuntatt jew l-isem tal-organizzazzjoni. Dan huwa aġġornament parzjali.
Trid twettaq aġġornament annwali (sħiħ) wara l-għeluq tas-sena finanzjarja tiegħek sabiex tipprovdi l-informazzjoni finanzjarja għal dik is-sena:
- L-aġġornament annwali huwa meħtieġ darba fis-sena mir-reġistranti kollha
- Id-data tal-iskadenza hija sena wara d-data tar-reġistrazzjoni, u mbagħad sena wara d-data tal-aġġornament annwali
- Jekk ikun meħtieġ, tista’ twettaq aġġornament (annwali) sħiħ f’diversi punti fis-sena u kull darba dan ibiddel l-iskadenza li jmiss tiegħek
- Int (il-persuni kollha b’aċċess għar-reġistrazzjoni) se tiġi mfakkar dwar il-ħtieġa li tagħmel aġġornament 4 ġimgħat u ġimagħtejn qabel l-iskadenza
- Jekk ma taġġornax ir-reġistrazzjoni tiegħek sal-iskadenza, ir-reġistrazzjoni tiegħek tiġi sospiża u mbagħad titneħħa ġimagħtejn wara l-iskadenza
- Din il-proċedura hija awtomatika u ma tistax tiġi modifikata.
Tista’ tħassar ir-reġistrazzjoni tiegħek fi kwalunkwe ħin, pereżempju, minħabba li l-attività tkun intemmet jew ma tkunx għadek tfittex li tinfluwenza t-teħid tad-deċiżjonijiet tal-UE.
Mur fit-tab “Irreġistra jew aġġorna” meta tkun illoggjat, fejn issib l-opzjoni għat-tħassir.
Tista’ terġa’ tirreġistra meta jkollok attivitajiet rilevanti x’tiddikjara.
Reġistrazzjoni tista’ ma tkunx viżibbli jew tista’ tkun tneħħiet minħabba li:
- għadna ma vvalidajniex ir-reġistrazzjoni l-ġdida
- ir-rappreżentant ta’ grupp ta’ interess ma wettaqx l-aġġornament annwali obbligatorju
- ir-rappreżentant ta’ grupp ta’ interess ma weġibx għat-talba tagħna biex tiġi aġġornata r-reġistrazzjoni tiegħu.
Tista’ terġa tirreġistra jekk twettaq attivitajiet koperti mir-reġistru u tosserva l-kodiċi ta’ kondotta. Ladarba r-reġistrazzjoni tiegħek tkun ġiet ivvalidata, se tirċievi numru tar-reġistru ġdid.
Għal aktar informazzjoni, jekk jogħġbok irreferi għal-Linji Gwida.
Aħna nużaw l-EU Login bħala l-metodu ta’ awtentikazzjoni għall-utenti. Trid tuża l-kredenzjali tal-EU Login tiegħek biex taċċessa l-ispazju ristrett u r-reġistrazzjoni tiegħek.
Jekk insejt il-password tal-EU Login tiegħek, jekk jogħġbok ikkuntattja l-helpdesk tal-EU Login.
Jekk il-persuni ta’ kuntatt inbidlu, pereżempju, minħabba li telqu mill-organizzazzjoni, aġġorna r-reġistrazzjoni tiegħek. L-indirizzi tal-email ta’ dawk il-persuni li telqu mill-organizzazzjoni tiegħek għandhom jitneħħew mill-intestatura 6 tar-reġistrazzjoni (“Persuni b’aċċess għar-reġistrazzjoni”).
Persuni b’aċċess għar-reġistrazzjoni jeħtieġ li jkunu konxji li ħadd ieħor ma jista’ jaċċessa r-reġistrazzjoni. Għalhekk huwa importanti li jiġu aġġornati d-dettalji tagħhom kull meta jkun meħtieġ biex tiġi żgurata l-kontinwità tal-operat.
Għandek taġġorna din l-informazzjoni, pereżempju, wara fużjoni jew akkwiżizzjoni, hekk kif isseħħ il-bidla. Tista’ tagħmel dan bħala parti mill-opzjoni ta’ aġġornament annwali jew toħloq reġistrazzjoni ġdida u tneħħi dik preċedenti. Dan l-aġġornament ma jistax isir bħala aġġornament parzjali.
Il-kodiċi ta’ kondotta huwa sett ta’ regoli u prinċipji etiċi u tal-imġiba li r-reġistranti kollha jridu josservaw sabiex jiżguraw kundizzjonijiet ekwi fl-attivitajiet ta’ rappreżentanza ta’ grupp ta’ interess li jinvolvu l-istituzzjonijiet tal-UE. Għandek timpenja ruħek li tosserva dawn ir-regoli u l-prinċipji meta tirreġistra.
Ara l-paġna tal-kodiċi ta’ kondotta. Huwa wkoll anness mal-ftehim interistituzzjonali (Anness I).
Jekk int klijent jew intermedjarju, trid tiżgura li l-partijiet kollha fir-relazzjoni(jiet) kuntrattwali bejn il-klijent u l-intermedjarju jkunu rreġistrati. Meta testernalizza ċerti kompiti lil partijiet terzi li mhumiex irreġistrati għal attivitajiet koperti mir-reġistru, trid tiżgura li dawn jikkonformaw mal-istandards etiċi ekwivalenti għal dawk li japplikaw għalik.
Trid tinforma wkoll lill-impjegati tiegħek involuti f’attivitajiet koperti mir-reġistru dwar l-impenn tiegħek li tosserva l-kodiċi ta’ kondotta.
Barra minn hekk, trid tinforma wkoll lil kwalunkwe klijent jew membru rreġistrat bħala parti mill-attivitajiet koperti dwar l-impenn tagħhom li josservaw il-kodiċi ta’ kondotta.
Skont il-kodiċi ta’ kondotta, ir-rappreżentanti ta’ grupp ta’ interess iridu jiżguraw li l-informazzjoni li jipprovdu fir-reġistru tkun kompluta, aġġornata, preċiża u mhux qarrieqa.
Aħna nivvalidaw reġistrazzjoni u nippubblikawha wara li nikkonfermaw l-eliġibbiltà tar-rappreżentant ta’ grupp ta’ interess u li l-informazzjoni tissodisfa r-rekwiżiti applikabbli. Aħna nwettqu wkoll kontrolli tal-kwalità regolari biex nidentifikaw kwalunkwe ineżattezza, żball jew ommissjoni.
Meta nemmnu li reġistrazzjoni fiha informazzjoni mhux preċiża, aħna nikkuntattjaw lir-rappreżentant ta’ grupp ta’ interess ikkonċernat biex nitolbu aġġornament jew spjegazzjoni. Aħna nirċievu u nħarsu wkoll lejn ilmenti dwar l-allegat nuqqas ta’ osservanza minn reġistrant tal-kodiċi ta’ kondotta. Barra minn hekk, aħna nwettqu l-investigazzjonijiet fuq inizjattiva proprja tagħna biex niżguraw il-kwalità tad-data tar-reġistru.
Aħna nimmonitorjaw il-kontenut tar-reġistru u nistgħu ninvestigaw ilment li jallega li reġistrant ma jkunx osserva l-kodiċi ta’ kondotta. Nistgħu ninvestigaw ukoll fuq inizjattiva tagħna stess meta jkun hemm informazzjoni li tissuġġerixxi li reġistrant ma jkunx għadu eliġibbli li jkun fir-reġistru.
Id-dettalji ta’ dawn il-proċeduri huma stabbiliti fl-Anness III tal-ftehim interistituzzjonali.
Jekk niddeterminaw li inti ineliġibbli għax mhux qed tosserva l-kodiċi ta’ kondotta, inneħħu r-reġistrazzjoni tiegħek.
Skont il-gravità tal-każ, nistgħu wkoll nipprojbixxuk milli terġa’ tirreġistra għal perjodu speċifikat u nippubblikaw din il-miżura fis-sit web tar-reġistru. F’ċirkostanzi bħal dawn, ikollok id-dritt li tressaq talba motivata għal rieżami tal-miżuri meħuda mal-Bord tat-Tmexxija tar-reġistru.
Għal aktar informazzjoni, jekk jogħġbok ara l-Anness III tal-ftehim interistituzzjonali.
L-ilmenti jistgħu jitressqu mir-reġistranti jew minn xi ħadd ieħor. Tista’ tressaq ilment billi tuża l-formola online fl-ispazju ristrett/fir-reġistrazzjoni jew fis-sit web tar-reġistru. Għandek bżonn l-EU Login biex taċċessa l-ispazju ristrett/ir-reġistrazzjoni u l-formola.
L-ilmenti jridu:
- jiġu sottomessi bil-miktub, bl-użu tal-formola tal-ilmenti pprovduta fis-sit web tagħna
- jidentifikaw ir-reġistrant inkwistjoni u jkunu deskritti b’mod ċar
- ikunu sostnuti minn evidenza suffiċjenti li l-kodiċi ta’ kondotta ma ġiex osservat
- jiġu ppreżentati fi żmien sena wara l-allegati ċirkostanzi ta’ nuqqas ta’ osservanza
- jinkludu ismek u d-dettalji ta’ kuntatt tiegħek.
Jekk inqisu li l-ilment tiegħek huwa ammissibbli, niftħu investigazzjoni u ninnotifikaw lilek u lir-reġistrant inkwistjoni.
Jekk inqisu li l-ilment huwa ammissibbli, niżguraw li tirċievi kopja tal-ilment u nitolbuk tipprovdi tweġiba motivata sa ċerta skadenza.
Nistgħu nitolbuk tipprovdi informazzjoni addizzjonali u nittrattaw kwalunkwe informazzjoni li tindika bħala sensittiva b’mod kunfidenzjali. Se tingħata l-possibbiltà li tesprimi l-fehmiet tiegħek bil-miktub qabel ma tittieħed kwalunkwe deċiżjoni. Nistennew li tikkoopera b’mod sinċier u kostruttiv matul l-investigazzjoni.
Jekk jogħġbok ara l-paġna dwar il-Governanza.
Jekk jogħġbok ara l-paġna dwar l-istatistika.
Il-paġna Fittex tippermettilek tfittex fir-reġistru skont il-kelma ewlenija u kriterji oħra. Il-portal uffiċjali tal-UE għad-data Ewropea (data.europa.eu) jipprovdi data storika mir-reġistru (mill-2015).
Ir-Rapport Annwali dwar il-funzjonament tar-Reġistru huwa sors ewlieni ta’ statistika u informazzjoni dwar ir-reġistru, il-kontenut tiegħu u l-miżuri u l-iżviluppi relatati. Ara r-rapporti annwali tal-imgħoddi.
Jekk inti ġurnalist, jekk jogħġbok ikkuntattja lis-servizzi tal-istampa tal-istituzzjonijiet rilevanti għall-mistoqsija tiegħek:
- Servizz tal-kelliema tal-Parlament Ewropew
- Servizz tal-kelliema tal-Kunsill
- Servizz tal-kelliema tal-Kummissjoni.
Jekk int student jew riċerkatur, tista’ tibgħat deskrizzjoni qasira tar-riċerka tiegħek u l-mistoqsijiet tiegħek lis-segretarjat permezz tal-formola ta’ Ikkuntattjana (teħtieġ l-awtentikazzjoni bl-EU Login).
Għal mistoqsijiet oħra, tista’ tuża wkoll il-formola Ikkuntattjana (teħtieġ l-awtentikazzjoni bl-EU Login).
Għandek tittratta direttament mas-servizz ta’ akkreditazzjoni tal-Parlament Ewropew biex tikseb aċċess bħala rappreżentant ta’ grupp ta’ interess irreġistrat. M’għandekx għalfejn tilloggja fir-Reġistru tat-Trasparenza biex timmaniġġja l-akkreditazzjoni tiegħek.
Għal aktar informazzjoni, jekk jogħġbok irreferi għall-paġna tal-akkreditazzjoni tal-PE.
Le, il-Kunsill ma joħroġx badges ta’ aċċess permanenti lill-viżitaturi. L-aċċess għall-binjiet tiegħu jingħata fuq bażi temporanja u ta’ “ħtieġa ta’ dħul” u huwa soġġett għar-regoli ta’ sigurtà tal-Kunsill. Kuntatt:access [dot] generalconsilium [dot] europa [dot] eu (access[dot]general[at]consilium[dot]europa[dot]eu).
Le, il-Kummissjoni ma toħroġx badges ta’ aċċess permanenti lill-viżitaturi esterni. L-aċċess fil-binjiet tagħha jingħata fuq bażi ta’ “ħtieġa ta’ dħul”.
Jekk wara li tħares lejn il-mistoqsijiet kollha ta’ hawn fuq għadek ma sibtx it-tweġiba li qed tfittex, tista’ tikkuntattjana permezz tal-formola li ġejja (teħtieġ l-awtentikazzjoni bl-EU login).